Colombia leimina thi zat 254 an tling tawh

Colombia rama ruahsur nasain, Mocoa khuaa leimin leh chirhtawlh a thlena thi zat chu mi 254 an tling tawh a, an zinga mi 43 chu naupang an ni.

President Juan Manuel Santos chuan Pathianni khan chhim lam khawpuia chhiatna thlenna hmun a tlawh a, chhanchhuah hna thawh dante a enpui a ni. President chuan chhiatna thleng vanga thi zat hi an la pun chhoh a rinawm thu a sawi a, chhiat tawkte a tawrhpui thu a sawi bawk.

Kar kalta chhunga ruahsur nasa tak avang khan Mocoa khaw bula lui pathum chu nasa takin an lian a, tuilian hian lei, motor, in leh thingkung tam tak a hnawl a, khawpui chhungah chirh leh lung tam tak a lenlut bawk. Chhiatna thleng vang hian Mocoa khuaah hian electric leh tui supply a la chhia a, mi tam takin tui thianghlim zawrh laite ruk tumin dawr an rawk nasa nia sawi a ni.

President chuan chhanchhuah hna chak zawka thawh a nih theih nan emergency a puang nghal a, chhiatna thlenna biala hri leng tur venna atan health and vaccination campaign buatsaih a ni dawn tih a sawi bawk. Ruah ala sur chhunzawm reng avangin President chuan mipute chu fimkhur turin a chah.

Leminin leh chirh tawlh hian in tam tak a hnawl avangin mi 500 chuang chu sorkarin awm lailawkna tur a siamah an khawsa mek. Colombia sorkar chuan chhiatna thleng vanga thi chhugnte chu dollar 6,400 ṭheuh pek an nih tur thu leh, an invuina senso pawh sorkarin a tum sak tur thu a sawi. China leh Inter-American Development Bank chuan chhawmdawlna hna thawhna atan hian US dollar maktaduai khat leh dollar 200,000 an pe tawh a ni.

Colombia ram chanchina leimin rapthlak ber chu kum 1985 khan Armero bialah a thleng a, mi 20,000 chuang an thi a ni.