UK-in Jordan-ah military trainer tir dawn

United Kingdom (UK) chuan Islamic State (IS) firfiakte beihletna kawnga Jordan air force-te training pe turin military trainer eng emaw zat a tir dawn.

Prime Minister Theresa May-i chuan IS firfiakte beihletna kawng­ah an thawhho a ngaih thu a sawi a, Gulf ram nena an thawhdunna ṭha zawk siam dan turte pawh a la ruahman dawn a ni. PM May-i hian Jordan ram hi a tlawh dawn a, Jordan hruaitute chu Syria tualchhung indona thleng avanga raltlan pung zel chungchang pawh a sawipui ang.

May-i hian Saudi Arabia ram pawh a tlawh nghal dawn a, Britain-in EU chhuahsan a tum avangin sumdawnna leh security lama inzawmna nghet zawk siam dan turte a sawipui ang. Saudi Arabia hi Middle East-a UK-in sumdawnna lama a thawhpui ram lian ber a ni a, Saudi Arabia kaihhruai ṭangrual ramten Yemen-a sorkar laka helte laka beihpui an thlaknaah pawh Britain hian a pui a ni.