Moscow-ah nawrh huaihawt leh

Russia Prime Minister Dmitry Medvedev-a eirua puha bang tura phutin eptute pawlte chuan Pathianni khan Moscow-ah nawrh an huaihawt leh. Kar hmasa khan nawrh hi an lo huaihawt tawh bawk a ni.

Pathianni-a nawrh huaihawt zinga mi 31 chu police-te’n an man. Nawrh huaihawt hmasak ṭum khan mi 1,000 vel man an ni bawk a, eptu hruaitu Alexei Navalny chu man tel a ni. Police-te chuan mi 31 an mante chu dan palzut vanga hren an nih thu an sawi.

Prime Minister thupuangtu chuan eptu pawlte puhna chu thu dik lo, mimal inbeihna niin a sawi. Alexei Navalny hian kum 2018-a president thlanna neih turah Vladimir Putin chu khin a tum thu a sawi. Mahse Pathianni hmasaa nawrh an huaihawt vang khan ni 15 tang tura hrem a ni.

Nawrh huaihawt hi social media kaltlanga huaihawt leh thehdarh a nih avangin Russia sorkar chuan Internet page eng emaw zat chu a block sak nghal a, thuneituten an chhui chiang mek bawk. Mahse Pathianni-a nawrh huaihawtte hian eptu hruaitu, Navalny nen inzawmna an nei lo a, pungkhawmte pawh hi zirlaite an ni tih an sawi. Mahse thuneitute chuan phalna engmah an neih loh avangin dan kalha thilti an nih thu an sawi.