US-in Ukraine tan ralthuam $tld 1 man pek belh dawn

United States president Joe Biden chuan Nilaini khan Russia nena an inbeihna kalzelah, Ukraine tan ralthuam USD tluklehdingawn khat man hu pek belh an tum thu a puang.

US-in ralthuam a pek tur zingah hian 155mm howitzers 18 leh a mu 36,000, Harpoon anti-ship missile system pahnih leh Himars precision rocket artillery system-a hman tur rocket palite pawh an tel.

President Biden chuan Ukraine president Volodymyr Zelenskyy chu Nilaini khan phone-a biain, Ukraine-in a ram vehimna kawnga a beihnaah US chuan a thlawp zel dawn tih pawh a hrilh a ni. "Ukraine mipuite huaisenna, tawrhchhelna leh tumruhna chuan khawvel pum a hneh hle a ni," tiin Biden chuan a sawi.

Ukraine president Volodymyr Zelenskyy chuan US-in an ram defence thuamchakna tura a puihna tur a siam thar leh chu lawmawm a tih thu sawiin, a bikin Donbas bial venghim tura an beihnaah a pawimawh dawn hle a ni, a ti.

Russia sipaite chuan Ukraine khawchhak lam, Donbas bial chu an la bei chhunzawm zel. Russia president Vladimir Putin chuan China president Xi Jinping biain, Xi chuan Russia-in a ram himna leh thuneihna humna tura a beihna chu a thlawp thu pawh a hrilh a ni.

Ukraine defence minister Oleksiy Reznikov chuan Brussels-ah Ukraine Defence Contact Group-a ram 50 officialte pawh hmuin, ralthuam leh silaimu tam zawk pe turin an ngen a ni. Ukraine hi dinhmun ngaihtuahawm takah a ding mek a, chuvang chuan ke kan pen vat a ngai a ni," tiin NATO hotu Jens Stoltenberg chuan a sawi.