Pakistan Minister-in economy tlahniam vangin Thingpui in tlem turin mipuite a ngen

Sum harsatna vanga talbuai mek, Pakistan chuan an ram foreign exchange reserves tlahniam chak tak avangin rampawn aṭanga an lakluh ṭhinte chu titlem tura chahin, ram mipuite chu thingpui in tlem turin a ngen.

Pakistan hian fiscal year 2021-22 chhungin thingpui lakluh nan Rs tld 83.33 ($ mtd 400) an seng tih report a nih hnuah, he rawtna hi federal minister for planning Ahsan Iqbal chuan a siam a ni.

Khawvela thingpui lalut tam ber zinga mi, Pakistan chuan thingpui lalut turin pawisa an puk a ngai tawh a ni. "Sum puk(loan) hmanga thingpui hi kan lakluh avangin mipuite chu thingpui no 1-2 vela intlem turin ka chah duh a ni," tiin Iqbal chuan Thawhlehni khan Islamabad-ah a sawi.

Sorkar sum hman dan tihchhuahah Pakistan chuan fiscal year hmasa aiin tuna kum kal mekah thingpui lakluh nan Rs tld 13 ($ mtd 60) in a seng hnem tawh zawk. Kum 2020-21 chhung khan, Rs tld 70.82 ($USD mtd 340) chu thingpui lak luhnan a seng a ni.

Minister-in thingpui no hnih khat vela in tlem tura a tih chu mipui zingah a tla na lutuk lo a, Twitter lamah sawiselna a tawh phah nasa hle.

Planning minister chuan sumdawng pawlte pawh kawlphetha renchemnan zan dar 8:30-a an dawrte khar turin thupek a lo tichhuak tawh a ni.Tunhnai khan finance minister Miftah Ismail chuan thutlukna huaisen tak tak siam a nih loh chuan Sri Lanka angin an dinhmun hi a chhiat theih thu a lo sawi tawh bawk a ni.