NKorea-in hri chi dang a len thu a puang

North Korea chuan Covid-19 hri leng vanga inkharkhip an kalpui hnuah nimin khan pum lam natna la hmuhchhuah ngai loh a darh thu an puang leh.

North Korea hotu Kim Jong Un chuan Nilaini khan khawthlang lama lawng chawlhna hmun Haeju-ah he natna leng thar tuar mekte hnenah damdawi a thawn tih state media KCNA chuan a tarlang.

He natna hri leng thar kai zat leh, eng ang takin nge a nat tih sawichian a ni lo a, 'acute enteric epedimic' tih chauhin an sawi. Enteric hi pum lam natna sawinana hman a ni.

"Kim chuan tlang hri leng chu a rang thei ang bera khuahkhirh a pawimawh thu a sawi a, hri kai nia rinhlelhte chu khunghrangin an inkaidarh tur ven a ngaih bakah epidemiological examination leh scientific test hmangin hri kaite hi finfiah phawt a ngai a ni," tiin KCNA chuan a sawi.

NKorea hian a vawi khatna atan an ramah Covid-19 a leng tih an puan hnu lawkah hri leng dang a awm leh thu an puang a ni. Vaccine leh medical supply indaih lohna avangin thla hmasa khan state of emergency an lo puang tawh a ni. NKorea-ah hian Covid symptom, khawsik nei report mi 26,010 an awm belh leh a, April thla tawp aṭanga chhinchhiah danin natna nei mi mtd 4.56 dawn an awm tawh. Hri leng vanga thi chu mi 73 an awm tawh bawk a ni.

Nitin khawsika damlo an puangzar ziah ṭhin a, testing kit an indaih loh avangin Covid kai erawh an tarlang ngai lo thung. Covid hri leng hian ziaawm lam a pan thu a sawi a, mahse World Health Organization chuan hri leng chungchangah rinhlelhna lian tak an neih thu leh an dinhmun hian chhiat lam a pan zawk hial an rin thu a sawi thung.