St. Petersburg metro-a bomb puakah mi 11 an thi

Russia ram khawpui pahnihna, Saint Petersburg metro system-ah Thawhṭanni khan bomb a puak a, mi 11 an thi a, mi dang eng emaw zatin hliam an tuar.

Russia thuneitute chuan central Sennaya Ploshchad metro station-a pawikhawihna thleng hi firfiakte thiltih niah an ngai a, midang tihpuah a ni em pawh chhui tel nghal a ni dawn tih an sawi. Bomb puak nimin thleng khan eng pawl mahin an tih niin a la chhal lo.

Thawhṭanni chawhnu dar 2:40 vel khan metro station-ah hian mi pakhat chuan bomb hi a hnutchhiah a, amah hian bomb dang pawh rel dangah a chuanpui leh niin media report chuan an tarlang. Mahse police-te chuan metro station danga bomb kam hi hmuin a puah hmain an sut hman a ni. National Anti-Terrorism Committee chuan metro station-a bomb puakah hian mi 11 an thi a, hliam tuar mi 45-te hi damdawi-inah enkawl an nih thu a sawi.

Bomb puah hnu hian St. Petersburg thunetiute chuan khawpui chhunga metro station-te an khar nghal vek a ni. Metro hi nitin mi maktaduai thum velin an hmang ṭhin a ni.

Russia khawpui lian leh an transportation system hi tunhma lamin Chechen fighter leh North Caucasus biala Islam helhoin an bei fo a, mahse tunhnaiah hetiang pawikhawihna thleng ṭhin hi a ziaawm chho tawh hle a ni. Kum 2010 khan Moscow metro-ah hmeichhe pahnihin thihchilh bomb an tihpuah avangin mi 38 an thi a, kum 2011 January thla khan Domodedovo airport-ah thihchilh bomb puak vangin mi 37 an thi bawk.

Russia President Vladimir Putin chu pawikhawihna a thlen lai hian St. Petersburgh khawpuiah hian a awm a, Thawhṭanni zan khan bomb puahna hmun hi a tlawh nghal a, bomb puaka thite hriatrengna pangpar pawh a dah nghal a ni.

Ram hrang hrang hruaitute chuan Russia-a pawikhawihna thleng hi an dem thu an sawi. US President Donald Trump chuan Putin chu telephone-a biain a tawrhpui thu a hrilh a, pawikhawihtute zawnchhuah leh firfiakte beihletna kawngah US sorkar chuan a thlawp zel tur thu a hrilh. China sorkar pawhin metro station beih a ni chu a dem thu sawiin, Foreign Minister Wang Yi chuan Russia an tawrhpuina thuchhuah a siam a, China chuan firfiaka chetna lam hawi reng reng a dodal tlat a ni, a ti.

UN Security Council chuan St Petersburg khuaa pawikhawihna rawng tak thleng chu mi dawihzepte thiltih a ni tiin a dem thu a sawi a, pawikhawihtute chu manchhuah ngei an duh thu sawiin, resolution an siam nghal bawk.