Afghanistan military hospital beih vangin general pahnih ban

Afghanistan sorkar chuan helhoin an rama sipai hospital lian ber an beih avangin sipai officer 12-te chu an hna thawhnaa inthlahdahah puhin a ban a, an zingah hian general pahnih an tel.

Thla hmasa khan Kabul-a Sardar Daud Khan hospital-ah helho chu doctor anga inthuamin an lut a, a chhunga awmte an bei a ni. Defence Ministry chuan he pawikhawihna thlengah hian mi 50 an thi niin a sawi a, mahse security lam chuan thi zat hi 100 an chuang niin an sawi. Hospital beitute zingah hian intern tilai pahnih an tel nia sawi a ni a, mahse sorkar lam chuan hospital-a thawk inhnamhnawih an awm lo niin a sawi thung.

Sadar Daud Khan hospital hi venhimna ṭha tak hnuaia enkawl a ni a, hetichunga beih a nih avang hian sawizui a hlawh hle a, pawikhawihnaah hian sipai zingah high-ranking official-te an inrawlh nia rinna pawh a lian hle. Islamic State (IS) firfiak chuan hospital beitu an nih thu hi sawi mah se, hospital-a awmte chuan pawikhawihtute hian Taliban firfiak pawl an thlawpna thu an sawi niin an tarlang a, damdawi-in first floor-a damlo awmte beiin, Taliban mi pahnih awmte erawh chu kut an thlak ve lo tih an sawi.