Ethiopia sipaiten Tigray bial khawpui an la

Ethiopia prime minister Abiy Ahmed chuan an ram hmarlam, Trigray People's Liberation Front bial nena hun eng emaw chen an inbeih hnuah, sorkar sipaite chuan Tigray region khawpui, Makelle chu an la tawh tih a sawi. 

PM Ahmed hian November thla tir lam khan regional party, TPLF hian Mekelle-a Ethiopian army northern command headquarters an beih avangin Tigray bialah sipaiten beihpui an thlak dawn tih a sawi tawh a ni. TPLF leh sipaite inbeihna avang hian za telin nunna an chan tawh a, hmun him lama tlanchhia mi tam tak an awm bawk. 

Pathianni khan PM chuan Mekelle chu sipaite kutah a awm tawh tih sawiin, beihpui thlakna chu hlawhtling taka zawh a ni tih a sawi. TPLF ten an man, Ethiopia sipai 7,000 vel chu chhuah an ni a, airport leh regional office-te pawh sipaite kutah a awm tawh a ni, a ti. Mekelle-ah hian mi nuai nga vel an cheng a, civil mite tawrhna thlen lo turin fimkhur takin sipaite hian beihpui an thlak tih Ahmed chuan a sawi a, beihpui thlaknaah hian civil mi thi leh hliam an awm leh awm loh erawh a sawilang lo. 

Hetih lai hian TPLF hruaitu Debretsion Gebremichael chuan a tawp thlengin sipaite hi an bei let dawn tih a sawi a, an dikna chanvo humhim turin theihtawp chhuah zel an tum tih a sawi. Sipaiten Mekelle an la tawh nia sawi chungchang erawh a sawi zui ve lo a, he khawpui beihnaah hian Eritrea sorkar chu a inrawlh niin a puh.