Europe ram hruaitu ṭhenkhatte'n Ukraine an tlawh

Germany, France leh Italy ram hruaitute chuan Ningani khan Ukraine an tlawh a, Russia nena inbeihna hmachhawn mek leh ralthuam tam zawk diltu tan hian EU member nih theihna kawng zau tak a in hawn thu an sawi.

Ukraine president Volodymyr Zelenskyy nen inbiakna an neih hnuah, ram hruaitute hian Ukraine chu European Union an zawm theihna tur kawng hawngtu, candidate status pek an duh thu an sawi bawk.

Scholz chuan Ukraine mipui ralthlan 8,00,000 velte chu an ramah an awmtir tawh a, a tawp thlengin Ukraine an ṭanpui tur thu sawiin "Ukraine chu Europe chhungkua zinga mi a ni," a ti.

Ukraine official-te chuan khawchhak lam khawpui, Sievierodonetsk-ah an sipaite chuan Russia sipaite chu an la dang mek tih sawiin, chhim lamah pawh an nawr let tih a sawi.

Khawthlang ramte'n chhawmdawlna an pek chu an innghahna ber a nih thu sawiin, Russia ralthuam chungchuang tak tak do let turin an puihna chu an mamawh hle tih an sawi. "Kan thawhpuite'na min ṭanpuina hi kan ngaihlu hle a, heavy weapon, modern rocket artillery, anti-missile defence system-te pawh an rawn thlen belh kan beisei a ni," tiin Zelenskyy chuan Europe ramte nen an inbiak hnuah a sawi.

"Ralthuam kan neih ṭhat poh leh kan ram leh mipuite kan chhanchhuak rang thei dawn a ni," a ti.

Macron chuan France-in ralthuam tam zawk pek a tum thu a sawi a, Brussels-a NATO defence minister meeting chuan US kaihhruai sipai ṭangrualte chuan Ukraine tan ralthuam tam zawk thawnluh an tum thu an tarlang bawk.