NKorea-in pum lam natna nei Chhungkaw 800 hnenah ṭanpuina sem dawn

North Korea hotu Kim Jong Un leh senior official-te chuan pum lam natna hri leng mek vei chhungkua 800 hnenah chhawmdawlna an thawn dawn tih state media chuan nimin khan a sawi.

NKorea hian Covid-19 hri leng vanga buaina an tawh hnuah, "acute enteric epidemic" an tuar leh mek thu an puang leh a ni. He natna thar hi chiang taka puanzar a ni lo a, pum lam natna, gastrointestinal tract tih chauhin an sawi a ni.

"Official-te hian damdawi, eitur leh nitin khawsak mamawh bakah Haeju khawpui leh Kangryong district bial(Hwanghae Province chhim lam)-a mite pangngai taka an khawsak theihnan ṭanpuina an buatsaih a ni," tiin Korea Central News Agency (KCNA) chuan a sawi.

Kim chuan official-te chu an hna ṭha taka hlen tura chahin, mipui phurrit leh tawrhna lakiang thuai turin a chah bawk.

Ningani vek khan, South Korea-a Unification Ministry official, inter-Korean affairs changtu chuan Seoul-in hri leng chu a thlithlai reng a, tuihri emaw khawsikpui emaw a nih an rin thu a sawi.

NKorea hian khawsik nei dam lo ṭhahnem tak an awm thu an puang a, test kalpuina tur khawl an neih ṭhat tawk loh avangin Covid-19 kai an ni em tih erawh finfiah theih a ni lo. KCNA chuan nimin khan khawsik nei mi 23,160 an awm belh leh tih sawiin, April thla tawp aṭangin natna nei mi mtd 4.58 chuang an awm tawh a, hri vanga thi chu mi 73 an awm tawh a ni.