Kar 5 hnuah Covid vanga thi an pung

Khawvel pumah kar nga chhung vel Covid-19 hri thihpui an tlakhniam hnuah, kar liam ta khan thihpui zat chu 4% in a sang chho leh tih World Health Organization (WHO) chuan a tarlang.

Kartin Ningani apianga hri leng chungchang zirchianna an tihchhuahah, UN health agency chuan kar liam ta khan Covid-19 vanga thi mi 8,700 an awm a, hri vanga thi hi America-ah 21% leh Western Pacific-ah 17% in an pung a ni.

WHO sawidanin, coronavirus hri leng chuan ziaawm lam a pan zel a, kar hmasa khan hri kai mtd 3.2 awmin January thlaa a peak a thlen hnuah Covid-19 chuan tlakhniam lam a pan tawh a ni. Region ṭhenkhatah erawh hri kai hi pung chho lehin, Middle East-ah 58% leh Asia chhim lamah 33%-in a pung.

"Ram tam takin hnuchhui leh test an tihtlem tawh avangin, report hi a kim tawk lo a ni," tiin WHO Director-General Tedros Adhanom Ghebreyesus chuan a sawi.

Khawvel mipui 33%-in Covid vaccine la la lo
World Health Organization-a Regional Director for Europe Hans Kluge chuan Ningani khan khawvel puma mipui 33%-te chuan Covid vaccine dose khatna pawh an la lak loh thu a sawi. Vaccination campaign ṭantirh khan ram hausate hnenah vaccine pekchhuah hna hi thlurbing deuh a nih avangin tun thleng hian vaccine indaih lohna chuan khawvel pum a la nghawng phak a ni, tiin St. Petersburg-a International Economic Forum an neih ṭumin Kluge chuan a sawi a ni.