Iran hotuin phuba lak a tiam

Iran ram hotu lu ber, Ayatollah Ali Khamenei chuan an ram top nuclear scientist Mohsen Fakhrizadeh thattute chungah phuba lak ngei a tiam. 

Kar liam ta Zirtawpni khan Iran nuclear scientist, defence ministry-a  Research and Innovation Organisation hotu Fakhrizadeh hi Tehran khawchhak lam dai, Absard hmunah a motor chhunga a awm chu tu tih hriat lohten an kap a, hliam na tak turin damdawi-ina kalpui a nih hnuah a thi a ni. 

Fakhrizadeh thah a nih hi Iran sorkar chuan a tuar na hle a, foreign ministry chuan martar-ah an puang tih a sawi. A thihnaah hian Izrawle chu a inrawlh ngei a rin thu foreign minister chuan a sawi. Eng pawl mahin he pawikhawihna hi an tih a ni tih an la chhal lo. 

Khawthlang ram leh Israel sorkarte chuan Mohsen Fakhrizadeh hi Iran-in a ruak a nuclear weapon programme a kalpui mek duangtu berah an ngai a ni. Israel prime minister Benjamin Netanyahu pawhin news conference a neih ṭum  khatah a hming hi chhinchhiah turin a lo ti tawh bawk. Mahse kahhlum a nih chungchangah hian Israel lam chuan sawi engmah a la nei lo a, White House, Pentagon, US State department leh CIA lam pawhin engmah an sawi lo a ni. 

Khameini chuan Fakhrizadeh hnathawh chu an chhunzawm zel dawn tih sawiin, pawikhawihna thlentute leh a tirtute chu manchhuah an nih theihna turin Iran official-te chuan theihtawp an chhuah dawn a ni, a ti.