Chemical ralthuam hmanga beihnaah mi 72 an thi

Syria rama helho awp khaw pakhat chu tur hlauhawm tak hmanga beih a ni a, chemical ralthuam hman vang hian mi 72 an thi a, an zingah hian naupang 12 an tel. United Nations chuan he thil thleng hi chhui chian anih tur thu a sawi nghal.

Syrian Observatory for Human Rights chuan Indlib province-a Khan Sheikhoun khuaah tur hlauhawm tak thlak a ni a, hei vang hian mi tam tak chuan thawk lamah harsatna tawkin an thidang zui a, an chilphuan te a tla nasa niin an sawi. Edlib Media Centre chuan tur hmanga beih vanga natna tuarte, damdawi-in enkawl lai leh mitthi thlalakte chu social media lamah nasa takin an thehdarh zui bawk.

Kum 2013 August thla khan Ghouta khua chu tur hlauhawm tak, sarin gas hmanga beih a lo ni tawh a, mi tamtak an thi a ni. Khaw­thlang ramte chuan he thilah hian Syria sorkar chu a mawhphurtuah a puh a, mahse Syria sorkar chuan helpawlte tih niin a puh thung.

Khan Sheikhoun khuaa chengte chuan an khaw chungah thlawhtheihna thlawkin, a hnuah thil puak ring tak an hre zui a, hemi hnu hian khawchhunga chengte hian harsatna an tawk zui nghal a ni. Thlawhtheihna thlawk hi tu ta nge tih an hriat theih loh thu an sawi. A hmain helai hmun hi Syria leh Russia thlawhtheihna te chuan an lo bomb tawh a ni.

Russia chuan Khan Sheikhoun khaw beihnaah hian inrawlhna a neih loh thu a sawi. Syria sorkar pawhin chemical ralthuam a hman loh thu a sawi bawk.

UN Commission of Inquiry on Syria chuan thuchhuah siam nghalin, chemical ralthuam hman leh medical facility beih chu war crime a nih bakah, human rights law palzutna lian tak a ni, a ti. Hetianga titute chu hriatchhuah a, an phu ang hremna pek ngei tur an nih thu a tarlang. UN Security Council chuan Syria rama chemical ralthuam hman nia sawi a nih vang ihan emergency meeting a ko nghal a ni.

Syria rama sorkar sipai leh helho inbeihna avang hian civil mi tam tak chu hmun him lamah an tlanchhe tawh a, kum ruk zet tual­chhung indona a thlen hnuah an buaina hi an la chingfel thei lo a ni. UN chuan ram dangah mi maktaduai nga vel an tlanchhiat tawh bakah, ramchhungah mi maktaduai ruk vel chu himna zawngin an tlanchhe tawh niin a sawi. Tualchhung indona thleng vang hian mi 250,000 chuang an thi tawh bawk.