Venezuela-ah nawrh huaihawt leh police-te intibuai

Venezuela-ah President Nicolas Maduro duh lohna lantira nawrh huaihawt leh police-te an innawr buai a, police-te chuan mipui pungkhawmte hnawh darh nan hian tear gas, water cannon leh pepper spray-te an hmang.

Venezuela khawpui, Caracas-ah nawrh huai­hawt hi president candidate hlui Henrique Capriles leh rights activist Lilian Tintori-ten an ho a, police-ten kawngah daidanna an lo siamte chu an tichhia a ni. Nawrh huaihawt leh police-te innawr buainaah hian mi pakua-in hliam an tuar a, mi pakhat chu a ke-ah kah fuh a ni bawk.

Nawrh huaihawtte anmahni lo dang turin hian police-te chu sorkar thlawptu lam gang rualin an lo pui a, silai pawh an hmetpuak niin an sawi.

Venezuela eptute chuan an ramin sum lama harsatna nasa tak a tawh mek avanga chaw lam chi, damdawi leh mamawh dang duhkhawp hmuh tur a awm loh chungchangah sorkar chu mawhphurtuah puhin, president hi bang turin an phut a ni. Eptute hawn vawiin hian ram­chhung khawpui dangah nawrh huaihawt chhunzawm leh an tum.