Suu Kyi-in Rohingya Muslim-te thenfai nia sawi a pha

Myanmar State Counselor Aung San Suu Kyi-i chuan an ram sipaiten Rohingya Muslim-te thenfai hna an thawk nia sawi chu thu dik lo a nih thu sawiin, hetiang ṭawngkam hmanna tur pawh niloa a ngaih thu a sawi.

BBC-in a kawmnaah, Nobel peace prize pawh lo dawng tawh Suu Kyi-i chuan Rohingya Muslim tam zawk chenna, Rakhine state-a harsatna thlengte chu a hriat thu a sawi rualin, sipaiten thenfai hna an thawk nia sawi chu ṭawngkam hman awm loh tak a ni, a ti. Suu Kyi-i chuan Rakhine state-ah hian harsatna hrang hrang a awm a, Rohingya Muslim-te chu bitum bik an ni lo a, muslim leh muslim te ngei pawh an inthat a ni, a ti.

Myanmar sorkar chuan Rohingya-te hi citizenship a la pe duh lo a, dan loa Bangladesh aṭanga an rama pemluh angah ngai reng an la ni. Hei vang hian thuneitute leh mipui nawlpui lakah pawh enhran an la hlawh hle nia sawi a ni.

Kum 2012-a Rohingya Muslim leh Buddhist-te inkara buaina nasa tak chhuak vang khan Rakhine state-ah hian Rohingya mi sing te chu refugee camp-ah an la khawsa a, tunhnaiah police pakua thah an nih avanga sipaiten Rakhine-ah beihpui an thlak hnuah mi 70,000 vel chu Bangladesh ramah an tlanchhe bawk.

Sipaiten police thattute zawnga beihpui an thlaknaah Rohingya-te hi enhran leh bitum bik an ni a, pawngsual, thah leh nghaisak an tawk nasa nia sawi chu United Nations chuan a chhui chian tur thu a lo sawi tawh a ni. Mahse Myanmar sorkar chuan sipaite an puhna chu thu dik lo niin a sawi thung.

Rohingya Muslim-te chungchangah Suu Kyi-i hian aw a chhuah ngai lo a, hei vang hian sawisel pawh a hlawh pha hle.