Zelenskyy-a'n sipaite inbeihna Mykolaiv leh Odesa khawpui tlawh

Ukraine president Volodymyr Zelenskyy chuan Inrinni khan an ram chhim lama Russia sipaite nena an inbeih mekna, Mykolaiv leh Odesa khawpuite a tlawh.

President Zelenskyy hian Mykolaiv khawpuia building an tihchhiatte chu a hmunah tlawhin sipai te, official leh health worker-te a tlawh nghal bawk a ni. Indo ṭan tirha Russia sipaite beihpui thlakna, khawthlang lama Odesa khawpui pawh a tlawh nghal bawk. Russia-in Black Sea lak tuma a beihna kawngah khawpui pahnihte hi hmun pawimawh tak an ni. Zelenskyy chuan an khawpui Kyiv-a Russia sipaite an inhnuhdawh hnu khan ramdang hruaitu ṭhahnem takte chu inbiakna a neihpui leh tawh a ni.

Zelenskyy hian Mykolaiv-a sipaite hnenah medal hlanin, an ram neihchhun Ukraine chu ṭha takin enkawl turin a chah. He khawpui hi Russia sipaite'n lak tuma an beih nasat ber zinga mi niin rocket leh bomb hmanga beihpui an lo thlak tawhna hmun a ni. Kherson hmarthlang lam aṭanga km 100 vela hlaah awmin, indona ṭantirh aṭangin Russia thuneihna hnuaiah a awm tawh ṭhin a, mahse Ukraine nen inchuhin inbeihna hi an kalpui mek a ni.