Bangladesh tuilianah mi mtd 6-in harsatna tawk mek

Bangladesh-ah ruahsur nasa avanga tuilian chuan mi maktaduai ruk vel harsatna a thlen mek a, heng mite chhanchhuah hna thawk tur hian sipaite koh luh a ni.

Official-te chuan tui chim chin sang zel vangin ramchhung khawchhak leh hmar lama cheng mi mtd ruk vel chu hmundanga inhumhimna an zawn a ngai tawh tih an sawi.

Tui hian khawpuia river basin lian zual paliah hlauhawm chhinchhiahna, danger line an pel vek tawh a, kum 2004-a tuilian rapthlak tak thleng tluk zetin an dinhmun hi a hlauhawm tawh niin Flood Forecasting and Warning Centre (FFWC) thupuangtu chuan a sawi. Sunamganj-a mi tam takte chu tuichim chin sang zel karah rescue boat rawn thlen hma chu inchung zawla tawmhimna lo zawng turin a chah a ni.

Official chuan tuilian vanga thi report hi la awm mah se, unofficial report chuan mi 19 an thi tawh niin a sawi.

Ruahsurin kawngpui a tihchhiat avangin hmarchhak lam, Sunamganj district chu ram chhung hmun dang nena inkalpawh thei loin an awm mek. Syhlet-ah pawh tuiin runway a chim vek avangin international airport khar a ni bawk. Tuilian hian power station eng emaw zat a chim bawk a, hei vang hian heng hmunte hi khar niin, internet leh mobile phone service thlengin a nghawng buai a ni.

Disaster management ministry chuan tui lian hian ramchhunga administrative district 64 zinga 17 chu a nghawng tih an sawi. Sunamganj-a chenna in 90% dawn chu tuiin a chim tawh a, Sylhet-ah 80% vel a chim tawh bawk.