Spain-ah hmun eng emaw zatah ram a kang

Spain ram hmun eng emaw zatah ram a kang a, ram kang ṭhelh hna hi ngawrh taka thawh mek a ni. Hetih lai hian Spain ram khaw lum lam chuan zual lam a pan chho zel.

Europe khawthlang lam ramte chuan ni eng emaw chen khaw lum nasa tak an tuar mek a, hei hian climate change lamah hlauhthawnna pawh a siam lian hle.

Spain-a Zamora, Portugal ramri bul leh Catalonia bial chu ram kang thlen nasatna hmun a ni a, mahse ram kang vang hian thi leh hliam report erawh a la awm lo. Tun ṭuma Zamora-a ram kang hi kum za chuang chhunga he biala ram kang nasa ber nia sawi a ni.

Sierra de la Culebra mountain range-ah ram hectare 20,000 dawna zau a kang tawh a, ram kang hi an la ṭhelh mit thei rih lo a ni. Catalonia-a kangṭhelhtute chuan kangmei hi thunun tuma beiin, boruak lum leh chhim lam aṭanga thli rawn thawk chuan chetchhuah a tih harsat phah tih an sawi. Catalonia-a Baldomar-ah chuan kangmei chhuak hi an thunun thei tawh a ni.

Madrid chhim thlang lam, Toledo khuaa cheng mi 3,000 chu an awmna hmun a him tawk loh avangin hmun him lamah sawnchhuah an ni tawh bawk.