US-in cruise missile hmangin Syrian air base a bei
Syria sorkarin Idlib province-a helho beihnan chemical ralthuam a hmang nia sawi a nih hnuin, US chuan an Presidnet Donaldh Trump-a thupek angin Syria air base chu Tomahawk cruise missile hmangin a bei let ve nghal.
Syria sorkar kuta awm, Homs province-a Shayrat airfield chu nimin zing dar 3.45 vel khan Tomahawk missile 59 in kah a nih thu Pentagon chuan a sawi. US missile hian sipai hmun pawimawh tam tak a tihchhiatsak a ni.
Official-te chuan missile-te hi Mediterranean Sea-a indo lawnglian pahnih aṭanga kahchhuah an nih thu an sawi. Airbase-a airstrip, hangar, control tower leh ammunition area-te kah an ni. Tun ṭum hi kum ruk chhung Syria tualchhung indona a thlen hnua direct-in US sipaiten an beih ṭum khatna a ni.
Syria eptu pawl, National Coalition chuan US thiltih chu fakin, President Bashar al-Assad-a kaihhruai sorkar hnuaia tihhrehawm an nih tihtawpna tur kawng a nih thu leh, bul an ṭan tharna tur a nih thu an sawi.
Thawhlehni khan Syria sorkar laka helte kuta awm, Idlib province-a Khan Sheikhoun khua chu tur hlauhawm tak, chemical ralthuam hmanga beih a ni a, tur bomb thlak a nih vang hian mi 86 an thi tawh a, an zingah naupang 27 an thi. An tur hman hi sarin nia sawi a ni. Syria sorkar chuan Khan Sheikhoun khuaah chemical ralthuam a hman loh thu a sawi a, Syria ṭhianṭha Russia pawhin he pawikhawihna hi helpawlten chemical ralthuam an siamna hmun chu sorkar sipaiten an kah fuh vanga thleng niin a sawi thung. Mahse helpawlte chuan Russia puhna hi an pha a ni.
Russia President Vladimir Putin chuan US-in cruise missile hmanga Syrian airbase a bei chu international law bawhchhiatna a ni tiin, hei hian US-Russia inlaichinna thlengin a nghawng a ni, a ti. US in Syria a beih chhan chu ram dang chunga inlulinna leh, a chhuanlam pawh siamchawp mai niin a sawi bawk. Mahse Pentagon chuan beihpui an thlak tur hi Russia chu hriattir lawk anih thu a sawi a, hemi rual hian Russia pawmpuina erawh lak kher an tum lo tih US Secretary of State Rex Tillerson chuan a sawi.