Colombia President-ah hel hotu hlui Gustavo Petro thlang tling

Colombia President inthlanah hel hotu hlui, Gustavo Petro chu thlan tlin niin, left-wing member zinga President atana thlan tlin hmasak ber a ni.

Kum 62 mi, Petro hi Bogota senator a ni a, Bogota mayor hlui a ni bawk. Hnehna a chan hnua thu a sawiah, an ram inthlak danglam chhoh mek thu sawiin, an thil tum zinga pakhat - politics lama inhmangaih tawnna, inhriatthiamna kawngah a hruai mek a ni, a ti.

Petro hi helpawl, M-19 movement member hlui a ni a, mahse an pawl hi ṭhiah a ni tawh. An pawl hminga pawikhawihna thila a inhnamhnawih avangin jail-ah pawh a lo tang tawh a, mahse a hnuah ngaihdam a ni leh a ni.

President chuan an ram mipuite chu inpumkhatna ṭha tak nei tura sawmin, amah sawiseltu lian tak takte nen pawh thawhhona ṭha tak siam a tum thu a sawi. Eptu member zawng zawng pawh President chenna hmunah Colombia-in harsatna leh buaina a neihte sawipui turin lawm taka a lo dawnsawn zel tur thu a sawi.

"Tun sorkar aṭang chuan politics-a intihduhdahna leh dan hnuaia inrahbehna chu a tawp nghal dawn a, tuna chinah chuan inzahderna leh remna chauh a awm tawh ang," tiin ralthuam lek chhuahte chauh ni lo, kuthnathawk, ram leilung fa te, hmeichhia leh ṭhalaite pawh ngaih pawimawh an nih tur thu a sawi.

President kal chhuak tur Ivan Duque chuan result puan hnu lawkah Duque chu lawmpuina hlanin, Hernandez chuan a chak loh chu a pawm thu a sawi. "Kan ram inrelbawlna nghet taka kaltir kan duh a nih chuan result hi a nihna anga kan pawm a ngai a ni," a ti.