NKorea-in US a dem

North Korea chuan US-in Syria rama beihpui a thlak chu a dem thu sawiin, US thiltih dan chu midangte awpbeh tumna a nih thu sawiin, pawm zam theih loh a ni, a ti.

NKorea Forign Ministry chuan nimin khan thuchhuah hi siamin, US-in missile hmanga Syria ram a bei chu ramdangte zah lohna lian tak lantirna a ni tiin, an dem thu a sawi nghal bawk. NKorea hian Syria ram hi ṭhianṭha takah a ngai a, US-in missile hmanga Syrian airbase a bei chu na taka a dem thu sawiin, US sipaite chet dan chu an ram tan pawh warning a nih nghal thu a sawi. US-in inluling taka ram dangte awp a tumna lak aṭang chuan an inlo inven a ngaih tih a sawi bawk.

Syria sorkarin President Bashar al-Assad-a laka helte beihna atan chemical ralthuam a hmang nia sawi a nih hnuah, US chuan April 6 khan Tomahawk missile 59 hmangin Syria-a Shairat airbase chu a bei a ni. Cruise missile hmaga Syria beih a nih lai hian US President Donald Trump leh China President Xi Jingpint-te chuan Florida-ah zanriah an kil mek a ni. White House chuan beihpui a thlak hi Syria ram vauna tur chauh a nilo a, China hnenah NKorea-in a ṭhenawm ramte a vau ṭhin titawp tura nawr a nih theih nana China warning-na a ni tel tih a sawi.

US President Donald Trump chuan Syria beih a nih chhan chu US tana ṭha tur a nih vang a nih thu Congress-ah a sawi. Congress chamber pahnih hnenah kar kalta Inrinni khan Syrian airbase beihna tura thutlukna a siam chungchang hi ziaka hrilhin, US chuan a ram himna tur ngaihtuaha thil ṭul nia a ngaih vangin he thil hi a ti ta a ni, a ti.