Venezuela-ah eptu hruaitu hrem duh lohna kawng zawh huaihawt
Venezuela rama eptu pawl hruaitu, Henrique Capriles chu kum 15 chhung politics khelh thei lo tura hrem a ni a, amah thlawptu mi tam takin kar kalta Inrinni khan Caracas-ah lungawi lohna lantirin kawng an zawh.
Mipui pungkhawmte chuan sorkar an demna thu ziak hrang hrangte an keng a, an thu ziak ken ṭhenkhtaah chuan an rama dictator awm an duh loh thu te, inrahbehna thleng an dodal thu leh, Capriles chu President atana an duh thu inziahnate an keng a ni. Kar kalta Ningani-a mipuiten nawrh an huaihawt ṭuma police-te silai hmehpuaha thite sunna hun an hmang bawk.
Police-te chuan nawrh huaihawtten national ombudsman office an pan tur chu lo dangin tear gas-te an hmang a ni.
Eptu hruaitu, Cpariles hi nakkuma an ram president thlanna neih turah, presiden ṭanglai Nicolas Maduro-a khing thei tur ber leh paithla thei tura beisei a ni. Capriles chuan Miranda state governor hna chu a thawh chhunzawm zel tur thu leh, politics khel thei lo tura hremna pek a nih chu a khinglet dawn tih a sawi bawk.
Kum hnih liamta khan Venezuela sorkar chuan Congresswoman hlui Maria Coria Machado leh mayor hlui Daniel Ceballos-te chu politics khel thei lo turin a lo hrem tawh a, kum 2014 khan eptu hruaitu Leopoldo Lopez chu sorakr laka lungawi lohna lantir ṭuma tharum thlawhna thlenah puhin, ni 14 lung-in tang turin a hrem bawk a ni.