Khawvel puma hri kai Tam ber ni thleng leh

World Health Organisation (WHO) chuan Pathianni khan khawvel pumah Covid-19 kai hmuh chhuah tam ber ni a thleng leh tih sawiin, hemi nia hri kai hmuh chhuah thar hi mi 2,30,370 an awm tih a tarlang. Hri kai thar tam zualna hi US, Brazil, India leh South Africa ramte an ni. 

Khawvel ram pumah hri kai hmuh chhuah tawh hi nimin thleng khan mi 1,30,52,961 an awm tawh a, an zinga 5,71,859 in an thihpui tawh a ni.  Hetih lai hian hri kai hmuh tawh zinga 75,97,616 chu an dam leh tawh. US chu hri kai tamna leh, hri vanga thi tamna ber ram a la ni chhunzawm zel. Hri kai hmuh tawh hi 34,13,995 an tling tawh a, an zinga 1,37,782 in an thihpui tawh a ni. Brazil chuan dawtin hri kai 1,866,176 an awm tawh a, thihpui 72,151 an awm tawh bawk. India, Russia, Peru, Chile, Spain, Mexico leh UK te chu hri kai tam zualna ram 10 zingah an tel. 

South Africa chuan an rama coronavirus leng mek dona kawng khat atan zu zawrh khapna a siam leh dawn. President Cyril Ramaphosa chuan zu khapna siam hian zu avanga harsatna tawk, damdawiina awmte an ziaawm phah dawn a, hei hian hri kai dam lo enkawlna tur khum ruak pawh a tam phah thei dawn a ni, a ti. 

Ramaphosa chaun June thlaa zu zawrh khapna hlih a nih aṭang khan zu vanga harsatna tawk leh zu vanga chetsualna thlenga damdawiin lut an tam phah hle tih a sawi. Hei vang hian hri leng mek kara hospital lam indaih lohna tihziaawmna turin, zu zawrh khap a ni leh dawn tih a sawi a ni. SAfrica-ah hian Covid-19 kai an pung chak hle a, hri leng hluarna ram zingah a tel tawh a ni. Africa khawmuala hri kai hmuh tawh zinga 40% chu South Africa ram ami an ni a, an rama hri kai hmuh chhuah tawh hi 2,76,242 an tling tawh a, mi 4,079 in an thihpui tawh bawk. 

Mexico chuan Covid-19 hri vanga thihna thlen tam lamah Italy chu Pathianni khan a lehpel. Pathianni  khan hri vang hian  mi 276 an thi a, anni nen hian Mexico-a Covid-19 thihpui hi mi 35,006 an awm tawh a ni. Spain leh UK-ahte hri leng a darh chhoh hma khan khawthlang ramah chuan Italy ram chu Covid-19 hri hluarna ram hmasa ber a ni a, hei bakah hian he hri vanga thi tamna ram a lo ni tawh bawk. Hri leng hi an thunun chhoh avangin he hri vanga thi pawh hi an pung chak tawh lo a, thihpui hi mi 34,954 an awm a ni. Pathianni khan Mexico chuan thi tamna ramah lehpelin Mexico hi US, Brazil leh UK tih loah chuan Covid-19 vanga thi tamna ber ram a ni mek. Pathianni khan Mexico-ah Covid-19 vanga thi hi mi 100 chuang an awm rualin, hri kai thar mi 4,482 an awm a, an ni nen hian Mexico-a hri kai zawng zawng hi mi 2,99,750 an awm tawh a ni.

Covid-19 vaccine siamna kawnga ram hrang hrangte an intlansak lai mekin, Russia-a Sechenov University chuan Covid-19 vaccine chu clinical trial-ah mihringa enchhinna a nei zo tawh tih Pathianni khan Institute for Translational Medicine and Biotechnology director Vadim Tarasov chuan a sawi.

Vadim chuan June 18 aṭang khan Covid-19 vaccine tur hi clinical trial-ah  neih ṭan a nih thu sawiin, he enchhinna neiha volunteer hmasa berte chu kar liam ta Inrinni khan chhuah tawh a nih thu a sawi a, July 20-ah volunteer dawttute hi chhuah an nih dawn thu a sawi bawk.

Vaccine siamchhuaktute hi Russia-a Gamalei Institute of Epidemiology and Microbiology an ni a, Russia defense ministry chuan volunteer-teah hian vaccine hi chiu leh a nih thu sawiin fimkhur taka hma an lak thu a sawi bawk. Sechenov University-a Institute of Medical Parasitology, Tropical and Vector-Borne Diseases director Alexander Lukashev chuan vaccine hi market-a zawrh chhuah theih vat tum a nih thu a sawi. Russia hi khawvel ram zinga Covid-19 vaccine hmuchhuah tumna kawnga mihringa enchhinna nei zo hmasa ber a ni a, engtikah nge vaccine hi zawrhchhuah a nih dawn erawh hriat a la ni lo.