Yemen Houthi helte'n Saudi an bei tih an sawi

Yemen Houthi helte chuan nimin khan Saudi Arabia chhimthlang lamah missile an kah chhuah bakah drone hmangin beihpui an thlak tih an sawi niin Houthi thunun al-Masirah TV chuan a tarlang. Helte hian Khamis Mushait city, Asir region-a airport leh Jizan Region industrial area-a oil facility chu an bitum tih Houthi thupuangtu Yahya Sarea chuan a sawi niin al-Masirah chuan an report a ni.

Saudi kaihhruai ṭangrual pawlte'n thlawhtheihna hmanga beihpui an thlak beihletna a nih thu an sawi bawk. Hetihlai hia  Saudi kaihhruai ṭangrual pawl lam chuan Al Arabiya television kaltlangin ballistic missile pahnih leh bomb keng drone paruk, Houthi helte'n an kah chhuah chu an kap thla tih an sawi ve thung a, thi leh hliam an awm leh awm loh an sawi lang lo. Houthi helte hian Saudi Arabia hi thlawhtheihna leh missile vel vang hian an bei fo a, a tlangpuii ramri khuate an bei ṭhin a ni. Mahse Saudi lam chuan Houthi helte beihna missile-te hi an lo kap thla fo tih an sawi.

Yemen-ah hian kum 2014 aṭang khan civil war a chhuak tawh a, Iran ṭanpuiin Houthi helte an ram hmar lamah rorel an tum a, Saudi-in a ṭanpui President Abd-Rabbu Mansour Hadi kaihhruai sorkar chu an ram khawpui Sanaa aṭangin an nawr chhuak hial nghe nghe. Mahse Saudi kaihhruai ṭangrual pawl lam chuan 2015 aṭang khan Houthi helte lakah hian beihpui an thlak let ve leh tawh thung.