Egypt sorkarin emergency puang

Egypt President Abdel Fattah el-Sisi chuan Pathian­ni-a Palm Sunday lawma inkhawm neih laia Coptic Kristian biak-in pahnih beih a nih avangin ram pumah thla thum chhung atan emergency a puang.

Pathianni khan Tanka khuaa Coptic Kristian biak-in, St. George-ah inkhawm laiin bomb tihpuah a ni a, mi 24 an thi a, midang 71-in hliam an tuar. Bomb hi biak-in chhung tlar hma lamah tihpuah a ni a, thi zingah hian Tanta Court hotu Samuel George pawh a tel. A hnuah Alexandria-a Manshiya district-a Saint Mark Coptic Orthodox Church-ah thihchilh bomb a puak leh a, mi 11 an thi a, mi dang 60 chuangin hliam an tuar a ni.

Islamic State of Iraq and the Levant (ISIL) firfiak pawl chuan biak-in bombtu an nih thu hi an sawi tawh a ni.

President Sisi chuan natio­nal defence council meeting neih hnuah emergency puan a nih thu hi TV-ah a sawi a, pawikhawihna thlenga inhnamhnawihte man a, an phu ang hremna pek an nih theih nan theihtawp an chhuah dawn tih a sawi.

Egypt ram danpui hnuai­ah President-in emergency a puan hi House of Represen­tative-ah pharh a ni ve leh ang a, anni hian ni sarih chhungin an pawmpui a ngai dawn a ni. Emergency law hnuaiah hian police-te chu mi man, enthlak leh dap kawngah thuneihna sang zawk pek an ni a, mipui mite chet vel danah khuahkhirhna siam theih a ni bawk.

Kum 2013-a sipai chakna hmanga President aṭanga Mohamed Morsi-a paihthlak a nih hnu khan Egypt-ah hian emergency puan a lo ni tawh bawk a, Sinai hmarlam bialah chuan emergency hi puan chhunzawm reng ala ni.

Pathianni-a Kristian biak-in pahnih beih a ni hi venhimna kenkawh ṭhat tawk loh vang nia puh a ni a, tunhnaiah Egypt ramah hian Kristiante biak-in beih a ni fo nia sawi a ni bawk.

Pawikhawihna a thlen hnu hian Tanta-a Coptic Kristian-te biak-in chu tlawh theih loha khar nghal a ni a, biak-in bulah hian police-te duty tir an ni a, building luh dawnah metal detector dah ni mah se bomb tipuaktu hi awlsam takin a lut thei nia sawi a ni. Bomb hi prayer hall-a ṭhut-thleng hnuaiah tihpuah a ni.