Hungary-ah university bill duhloin kawng zawh

Hungary khawpui, Budapest-ah Pathianni khan university bill siam thar duh lohna lantirin mi tam takin kawng an zawh.

Kar kalta khan Hungary parliament-ah PrimeMinister Viktor Orban-a kaihhruai rorellai Fidesz party chuan university bill siam thar hi a pass a ni. He bill-ah hian Hungary-a foreign university awmte tan kaihhruaina dan thar siam a ni a, Hungarian-a piang American billionaire, George Soros-a university din, Central European University (CEU) pawh hnawhchhuah theih a ni dawn a ni.

University bill pass thar hian Hungary rama univeristy dintute chu an mahni ramah ṭheuh campus leh faculty te nei tel turin a phut a, hie bakah hian EU pawn lam mite chu sorkar nena inremna an siam theih loh chuan Hungarian diploma an pekchhuah a khap bawk. He bill hi a taka hman a nih theih nan President Janos Ader-a'n a pawmpui phawt a, a hming a sign hnan a la ngai a ni.

Kum 1991-a Soros-a'n a din, CEU hi US-ah in register mah se, US-ah hian campus a nei lo a, hei vang hian university dan thar hnuaiah hian Hungary aṭanga hnawhchhuah theih a ni ang. CEU-ah hian zirlai 1,800 vel an awm mek a, World University Ranking-ah poltiical and international studies bikah top 50-ah a lang phak a ni.

Parliament-in university bill thar a siam duh lohna lantira kawngzawh huaihawtah hian mi 80,000 vel an tel a, hun rei tak chhung Hungary-a nawrh huaihawtnaa mi an tel tam ber ṭum a ni. Mipui pungkhawm te chuan President Ader chu a hming sign lo tur leh, bill siam thar hi lo hnawl turin an phut a ni.