Covid-19 vanga school kal thei tawh lo tur naupang mtd 10 dawn an awm
Save the Children chuan nimin khan Covid-19 hri leng vangin kumin kum tawp thlenga khawvel puma school kal chhunzawm thei tawh lo tur, naupang maktaduai 9.7 an awm thu a tarlang.
West leh Central Africa, Yemen leh Afghanistan-a naupangte chu hri leng vanga high risk-a an awm avangin an tan school kal a him lo a, lockdown hlih a nih hnu pawhin school an kal chhunzawm theih a rinawm loh a ni. Hei bakah hian ram dang 28-a school naupangte pawh an himna ngaihtuaha school kal rih lo tura tih an la ni bawk.
Covid-19 leng vangin ram hrang hrangte chuan inkharkhipna (lockdown) an kalpui a, hei vang hian khawvel puma school kal thei lo naupang hi tluklehdingawn 1.6 vel an awm mek a ni. Hei bakah hian hri len chhung hian hmeichhe naupang khuaikhemna a thleng tam a, naupang lama inneihna a pun bakah, hmeichhe tleirawl naupai an tam phah bawk a ni.