Israel-in inthlanpui hmachhawn leh ngai dawn

Israel-a ṭangrual sorkar chuan kar leh hian Parliament ṭhiahna tur bill pulutin vote lak a ni dawn tih Israel Prime Minister Office chuan Thawhṭanni khan a puang. He bill hi pass a nih chuan kum thum chhunga a ṭum ngana atan inthlanpui an buatsaih leh a ngai dawn a ni.

Ṭangrual sorkara prime minister Naftali Bennett thawhpui lian ber, Yesh Atid party hruaitu Yair Lapid-te chuan Parliament ṭhiahna tur bill hi kar leh Thawhṭannia put luh an rel a ni.

Parliament-ah bill hi a tlang chuan, prime minister dinhmun inchelh chhawk tura inremna an lo siam tawh angin foreign minister ni lai Yair Lapid chu interim prime minister-ah dah a ni ang a, sorkar thar din a nih hma chu he dinhmun hi a chelh dawn niin PM Office chuan a tarlang.

Inthlanpui hi October thlaah an neih rin a ni.

PM Bennett chuan Lapid nena thuchhuah inṭawm an siam a sawinaah hian, hun harsa tak an tawh mekah Israel mipuite tana thutlukna dik tak an siam nia an ngaih thu a sawi.

Bennett kaihhruaia party pariatten ṭangrual sorkar an din hi nikum June thla khan lakluh a ni chauh a, mahse a tir aṭangin right-wing, liberal leh Arab party-te thawhhona hi a derthawng nghal a ni. Bennett leh Lapid hian ṭangrual sorkar nghet siam tumin theihtawp chhuah mah se, an hlawhtling thei ta lo a ni.

Palestinian statehood, West Bank-a Israel ram luah leh sakhaw chungchangahte an inlungrual hlei thei lo a, April thlaa Yamina Party member pakhatin ṭangrual sorkar a thlawpna a hnuhdawh hnu khan Parliament-ah majority an nei zo tawh lo a ni. Parliament seat 120 awmah ṭangrual sorkar hian thlawptu member 59 chauh a nei pha tawh.

Inthlan neih ṭhat turah hian PM hlui, eptu hruaitu ni mek Benjamin Netanyahu chu a rawn din chan chhoh leh rin a ni. Mipui ngaihdan lakah Netanyahu-a party, Likud party chu inthlanah hian party mala seat la hnem ber tura rin a ni nghal a ni.