Russian journalist-in a Nobel Prize dawn Ukraine naupangte tan a hlan

Russia rama independent newspaper, Novaya Gazeta-a editor-in-chief Dmitry Muratov chuan Thawhṭanni khan Nobel Peace Prize gold medal a dawn chu Ukraine-a chenna tur nei lo naupangte tan USD maktaduai 103.5 in a hralh.

He medal hi New York-a Heritage Auctions kaltlangin hralh a ni a, a leitu hi puanzar a ni lo.

Kum 2021 khan Muratov chuan Philippines mi journalist, Maria Ressa nen freedom of expression humhalh tura an hnathawh ṭhat avangin he chawimawina hi an dawng dun a ni.

Murotov hi Soviet Union tluk chhiat hnu, kum 1993-a journalist rualte'na an din Novaya Gazeta dintu zinga mi a ni. Hei hi kuminah chuan Russia president Vladimir Putin sawiseltu leh ramchhung leh pawna a hmalakna dodaltu chanchinbu lian awmchhun a ni. Russia sipaite hmalakna sawiseltu apiang chu hun rei tak taninah khung an nih theihna tur dan siam a nih hnuah, Novaya Gazeta pawh hi tihtawp a ni zui ve bawk. Kum 2000 hnu lam aṭang khan Novaya Gazeta journalist-te leh hnathawk mi paruk te chu an hna kaihhnawih avang hian thah an lo ni tawh a ni. April thla khan Muratov chu rela a chuan laiin mi pakhat chuan oil-based paint hmanga beih a ni bawk.

Muratov-a medal hi auction neihna hmun leh online kaltlanga lei theih tura chhawpchhuah a ni. A hralhna sum zawng zawng chu UNICEF hnuaia Humanitarian Response hnuaiah lut vekin, Ukraine indona vanga naupang chenna tur nei lote ṭanpuinan an hmang dawn a ni.