Cambodia-a Mekong luiah freshwater sangha lian ber man

Cambodia ram hmarchhak lama thingtlang khaw mite chuan Mekong luiah chhinchhiah theih china khawvela sangha (freshwater fish) lian ber nia sawi, kg 300 a rit an man. Lui kama lachhuak turin mipa puitling 12 vel zet an thawhchhuah a ngai hial.

Sangha an man hi Boramy, Khmer ṭawnga thla bial "full moon" tiin an phuah a, a nu niin feet 13 zeta sei a ni. Scientist-ten a chetvelna leh khawsak dante an zir chian theihna tura tracker an vuah hnuah luiah hian an chhuah zui leh a ni.

He sangha hi June 13-a an man kha ani a, mahse Thawhṭanni khan joint Cambodian-US research project, Wonders of Mekong chuan thuchhuah hi a siam chauh a ni. Hemi hmaa freshwater fish man lian ber record chu kum 2005-a Thailand-a man, kg 293-a rit Mekong giant catfish a ni.

Mekong lui hi China, Myanmar, Laso, Thailand, Cambodia leh Vietnam ramahte luang tlangin, freshwater fish chi hrang hrang tamna a ni. Mahse scientist-te chuan tun hnaia 'dam' siam a nih hnuah luia sangha-te dinhmun hi a derthawng tawh niin an sawi.