UN Messenger of Peace atan Malal Yousafzai ruat

United Nations chuan UN Messenger of Peace atan Nobel Peace Prize lo dawng tawh, Pakistan tleirawl Malala Yousafzai a ruat.

Kum 19 mi, Yousafzai-i hian UK-ah lehkha a zir mek a, UN Messenger of Peace atana ruat tawh zinga naupang ber a ni. Kum 2012 khan Pakistan hmeichhe naupangte lehkha zirtir an nih theihna tura a campaign avangin Taliban firfiakte chuanYousafzai-i hi na takin an kaphliam a, UK-ah hian enkawl tura hruai niin a dam hnuah pawh lehkha zirin a awm chhunzawm a ni.

Yousafzai-i hi a lehkha zirnaah pawh a tiṭha hle a, UK-ah pawh politics, philosphy leh economics zir tura sawmna a hmuh thu a sawi a, mahse a university hming erawh a sawilang lo.

UN Messengers of Peace hi field hrang hrang - art, literature, science, entertainment, sports leh a dang aṭangtein thlan ṭhin a ni. Kumin UN-in messenger atana a ruat zingah hian Muhammad Ali, George Clooney, Michael Doughlas, Leonardo DiCaprio, Stevie Wonder leh Charlize Theron te an tel a ni.

United Nations Secretary-General Antonio Guterres chuan, Malala Yousafzai-i hian hmeichhe naupangte hnena zirna pek chungchang bik a thlurbing dawn tih a sawi a,Yousafzai-i'n hna alo thawhte chu UN-in mitinte dikna chanvo humhalh sakna tura a hmalakna nena inzul reng a ni tih sawiin, a bikin hmeichhia leh hmeichhe naupuangte tana huaisen taka a dinna avangin messenger atan hian ruat a nih thu a sawi.