America-ah Covid-19 nasat hun a la thleng lo : WHO

World Health Organization chuan America-a Covid-19 hri leng mek chu a nasat zual lai a la thleng lo niin a tarlang.

WHO Health Emergencies Program executive director, Michael Ryan chuan Nilaini khan press conference a neihnaah Central leh Latin America-ah chuan hri hi a darh chhuah mek thu a sawi a, America pum puiah hian Covid-19 hri hi a nasat zual lai a la thleng lo a ni, a ti.

"America pumpui thlir chuan hri darh nasat zual lai a la thleng lo niin a sawi theih a, a bik takin Central leh South America lamah chuan hri hi a darh chho mek a ni," tiin Ryan chuan a sawi. "Kar liam ta khan he hmuna ram hrang hranga hri darh chakna hi 25% leh 50% a ni a, chuvang chuan a nawlpui anga sawi dawn chuan America-ah hian Covid-19 hri hian a nasat zual hun lai a la thleng lo tiin kan sawi thei ang," tiin Ryan chuan a sawi bawk. 

Hengte avang hian WHO Health Emergencies Program Technical lead on the Covid-19, Maria Van Kerkhove chuan America-a ram hrang hrang sorkarte chu an ṭanrual a pawimawh thu leh he hri dona kawngah hian khua leh tui te chu sorkar chuan a thawhpui thiam a pawimawh thu a sawi. Maria chuan America-a hri kai punna hi 30% leh 40% a ni, a ti.

WHO Director General Dr Tedros Adhanom Ghebreyesus chuan Covid-19 hri leng hi kar lehah chuan maktaduai 10 an tlin a rin tawh thu a sawi.