Ram danpui chungchangah Russia-in mipuite vote a la ṭan

Russia sorkarin an ram danpui siamṭhat a tum chungchangah nimin aṭang khan mipuite vote lak ṭan a ni a, vote lak hun hi kar khat chhung hawn a ni ang. Danpui hi siamṭhat a nih chuan President Vladimir Putin chuan kum 2036 thleng ram hruaitu dinhmun a chelh chhunzawm thei dawn a ni. 

Kumin January thla khan President Putin chuan ram danpui siamṭhat hi a rawt a, April 22-ah mipui vote lak tura tih a ni. Mahse hripui leng avangin vote lak hun hi sawn hlat a ni a, July 1-ah vote lak tura tih a nih laiin, polling station-ah vote thlak tur mipuite inhnawhkhawm a awm lohna turin a hma kar khat aṭangin an hawng ṭan ta zawk a ni. 

Danpui siamṭhatna rawtna hi pawm a nih chuan, kum  20 chuang Russia ram hruaitu nihna lo chelh tawh, Vladimir Putin hian term hnih dang hruaitu dinhmun hi la chuh chhunzawm thei ang. Hei bakah hian president thuneihna tihchak te, sorkara thuneihna semzai dan tur chungchangahte danpui hi siamṭhat rawt a ni bawk a, hei hi Par­liament in hnih bakah, Constitutional Court pawhin an pawmpui tawh. 

Russia ramah hian nitin hri kai thar an la pun belh zel a, hei vang hian hetiang chungah vote lak a ni hian sawisel pawh a hlawh hle. Hri kai zat hmuh chhuah tawh hi mi 6,06,000 an awm tawh a ni. Mahse thuneitute chuan hri leng laka voter-te himna turin ruahmanna fel fai tak siam a nih thu an sawi thung.