Petrobras eiruk thubuaiah Brazil minister pariat inhnamhnawih

Brazil sorkar enkawl oil company lian, Petrobras-a eirukna lian tham tak thlenga inhnamhnawih zingah minister pariat an tel nia sawi a ni. Anni bakah hian MP pawh eng emaw zat an inrawlh nia sawi a ni bawk.

Petrobras-a eirukna thleng chungchang hi hun eng emaw chen buaipui a ni tawh a, tunhnaiah cosntruction firm Odebrecht chuan thamna, dollar tluklehdingawn khat a pek thu a sawi ve leh a, hetah hian official-te hming hi a tarlang tel a ni.

Supreme Court Judge Edson Fachin-a’n Petrobas-a eirukna leh thamna laknaa inhnamhnawiha puh list a tihchhuah hian mi 108 hming tarlan a ni. Thil diklo tihnaah hian politician tam tak chu an inrawlh a ni.

Thamna laa puh official chhui zingah hian Foreign Minister Aloysia Nunes leh Agriculture Minister Blairo Maggi an tel a, Brazil Congress in hniha hotu hlui te bakah, president hlui Fernando Henrique Cardoso, Luiz Inacio Lula da Silva, Dilma Rousseff leh Fernando Collor de Mello-te pawh chhui an ni bawk.