IS-in an ram luah hloh zel
Islamic State (IS) firfiak chuan an ram lak an hloh zel a, kum thum kaltaa Iraq ram 40% an lak aṭangin tunah hian 7% vel chauh an thunun tawh niin Iraq sipai thupuangtu chuan a sawi.
Iraq sipaite chuan firfiakte kut aṭanga an ram la let turin beihpui an thlak a, US kaihhruai ṭangrual ramten an pui bawk. Iraq ram khawpui lian pahnihna, Mosul khawpui chhung hmun tam zawk pawh firfiakte kut aṭang hian lak let a ni tawh.
Brigadier General Yahya Rasool chuan kum 2014 khan IS hian Iraq ram 40% vel an thunun a, mahse kumin March 31-ah kha chuan an ram luah chin hi 6.8% vel chauh a ni tawh a ni, a ti. Mosul khua hi kum 2014 khan Iraq sipaite kut aṭangin an la a ni.
US kaihhruai ṭangrual ramte thlawpnain, Iraq sipaite chuan nikum October thla aṭang khan Mosul khawpui lak let tum hian beihpui an thlak a, hun rei vak lo an chawlh lailawk hnuin an bei leh a, tunhnaiah phei chuan nitin indo thlawhtheihna hmangin IS-te awmna hmun hi an bei a ni. Khawpui chhung khawchhak lam bial chu January thla khan an la fel tawh a, February thla laihawl aṭang khan khawtlang lam bial laklet tumin firfiakte nen hian an inbei leh a ni. Mosul khua hi firfiakten sum an lakluhna hnar pawimawh tak a ni a, he khawpui pum hi laklet a nih hunah chuan firfiakte dinhmun pawh a chhiat phah hle rin a ni. IS hian Iraq khawthlang lam, Syria ramri bul bialte bakah khawpui lian dang, Hawijah leh Tal Afar-te an la thunun mek a ni.