Syria-in chemical ralthuam a hmang ngei : United States

US defence secretary chuan Syria sorkar chuan kar kaltaa helho awp khua a beihnaah tur hlauhawm tak, chemical ralthuam a hmang ngei a ni tih chu rinhlelh rual a ni lo tih a sawi. Hei bakah hian tunhma lam pawhin chemical ralthuam hi alo hmang tawh ṭhin a ni, a ti.

Washington-a press conference a neihah he thu hi sawiin, James Mattis chuan Idlib province-a Khan Sheikhoun khua beihnaah chemical ralthuam hman a ni ngei tih finfiahna document pawh a awm niin a sawi. He thila mawhphurtu ber chu Syria sorkar a nih thu a sawi bawk.

Syria sorkarin chemical ralthuam a hman vang hian US chuan missile hmangin airfield a bei ve nghal a, Syria defence system nasa takin a tichhiat sak a, a thlawhtheihna neih pawh 20 chuang a kahchhiat sak nia sawi a ni.

Hetih lai hian Syria leh a ṭhian ṭha, Russia chuan April 4 khan beihpui an thlak nia puhna chu an pha thung. Russia chuan US-in Syria airbase a bei chu na takin a lo sawisel tawh a, President Vladimir Putin-a chuan US-in missile hmanga Syria a beih leh niin thu an dawng tih pawh a sawi tel bawk.