US-in Poland-ah sipai sawn tum

US president Donald Trump chuan Germany-a US sipai awm mek zinga ṭhenkhat chu Poland-ah sawn a tum tih a sawi. 

Donald Trump hian Germany-a America sipai awm mek chu tihtlem a tum thu a lo sawi tawh a, sipai 52,000 an dah chu 25,000 ah a titlem dawn tih a sawi a ni. 

Nilainia US tlawhtu, Poland president Andrzej Duda nena White House-a an inkawmnaah, Trump chuan Poland-ah sipai ṭhenkhat thawn tum a nih thu hi a sawi a, "Poland hian sipai kan dah belh theih leh theih loh hi min zawt a ni. Sipaite dah luhna atana sensote hi an tum vek dawn a ni," a ti. Germany-a sipai lakchhuah ṭhen chu Poland leh Europe ram dang ṭhenkhatah dah a ni dawn a, a ṭhen chu US-ah koh haw a ni bawk ang, tiin a sawi.