US-in MOAB hmangin Afganistan-a firfiakte bei
US chuan Aghanistan-a Islamic State (IS) firfiakte chu ‘mother of all bombs’ tia hriat lar, GBU-43 bomb hmangin a bei.
Ningani khan MC-130 aircraft hmangin Pakistan ramri bul, Nangarhar province-a Achin district-ah bomb hi thlak a ni a, US hian IS firfiakte beihna atana non-nuclear bomb a hman tawh zinga lian ber a ni. GBU-43 hi kg 9,797 a rit, GPS-guided munition a ni a, kum 2003 March thla khan enchhin a ni a, mahse firfiakte beihna atan hman a la ni lo. Bomb puak hian km 1.6 bial a nghawng thei a ni.
US Central Command (CENTCOM) chuan Ningani-a Afghanistan-a firfiakte thenfaina atana bomb thlakah hian IS firfiak 36 an thi a, an tunnel complex pawh a chhe tel niin an sawi. Afganitan official-te pawhin civil mi thi an awm lo niin an sawi bawk.
Afghanistan-a US leh international force hotu General John Nicholson chuan, bomb hi Afghanisan-a IS firfiakte tawmbuk leh bunker an siamte beihna atana thlak a nih thu a sawi.
Kum 2015 aṭang khan IS firfiakte hi Afghanistan-ah hian an inkhuar ṭan a, bunker leh tunnel-te an siam nia sawi a ni. US chuan Afghanistan-a IS firfiak awm hi 700 vel niin a ngai a, mahse Afghan official-te chuan 1,500 vel an awm niin an sawi thung. IS firfiakte hian tualchhunga helpawlte an thawhpui fo ṭhin a, hei vang hian pawikhawihna thlengah pawh tunge mawhphurtu hriat a har phah ṭhin niin security official-te chuan an sawi. Aghanistan special force-te chuan America puihnain Achin bialah hian ni 14 kalta aṭang khan firfiakte lakah beihpui an thlak ṭan a ni.
Afghanistan president hlui, Hamid Karzai chuan MOAB hman a ni chu a dem thu sawiin, US chuan firfiakte dona atana hmang loin, an ram chu a ralthuam hlauhawm tak enchhinna atan a hmang zawk niin a sawi.
Hetihlai hian US roreltute chuan Afghanistan-a IS firfiakte a beih danah President Donald Trump-a kaihhruai sorkar chu an fak a, he thil hi firfiakte tana vauna a nih nghal thu an sawi. Senate Armed Services Committee senior member Senator Jim Inhofe chuan, US-in MOAB thlak tura thutlukna a siam hian Afghanistan-a IS leh firfiak pawl dang awmte nuai chimih a tumzia chiang takin a lantir a ni, a ti.
Inhofe chaun US President Donald Trump-a’n tih takzeta firfiakte beihlet a tum dan chu fakin, an hmelma leh ṭhianṭha ramte tan pawha hriattirna fiah tak a ni, a ti. Congressman Kevin pawhin Trump-a’n Islamic State (IS) laka a thuchah thawn chu Russia, North Korea, Iran leh ram dangte pawhin chiang takin an lo hre thei a ni, tiin a sawi.