Coptic Church-in Easter lawmna buatsaih dawn lo

Egypt-a Coptic Kristian-te chuan Pathianni-a Palm Sunday puala inkhawm neih laia an kohhran biak-in pahnih beih a nih avangin Easter Sunday-ah a lawmna inkhawm buatsaih an tum lo.

Palm Sunday khan Alexandria leh Tanta khuaa Coptic biak-in pahnih chu bomb hmanga beih a ni a, mi 45 an thi a ni. He pawikhawihna thleng vang hian Egypt sorkar chuan ram pumah thla thum chhung atan emergency a puang zui nghal a ni.

Coptic kohhran chuan Easter Sunday-ah hian a lawmna hran siam a ni dawn lo a, ṭawngṭai inkhawm chauh neih a nih tur thu a sawi.

Official-te chuan biak-in pahniha thihchilh bomb tipuaktute hming hi an puang a, firfiak pawl nena inzawmna nei niin an sawi. Bomb tipuaktu pakhat zawk chu Mahmoud Hassan Mubarak Abdullah a ni a, Suez province-a cheng a ni. Peteroleum company-a thawk ṭhin a ni a, nikum December thlaa Cairo-a Kristian biak-in beih an nih ṭuma mi 25 thina thleng pawh kha a tih niin an sawi. Tanta biak-ina bomb tipuaktu chu DNA test neih a nih hnuah Mamduh Amin Mohammed Baghdadi, Qena province a mi a nih thu interior ministry chuan a tarlang bawk. Hemi hma hian pawikhawihna thlenga inhnamhnawiha puh mi 19 hming chu puan a lo ni tawh bawk.