Afghanistan ram chhim lam, Pakistan nena an inrina bulah nimin zing khan lirnghing na tak thlengin, lirnghingin chhiatna a thlenah hian mi 1,000 chuang an thi a, hliam tuar mi tam tak an awm bawk. Thi zat hi an la punchhoh a rinawm thu official-te chuan an sawi. 
US Geological Survey (USGC) chuan lirnghing inṭanna hi Pakistan border, Khost khua aṭanga km 44 vel, km 51-ah thukah a ni tih sawiin, a nat zawng hi richer scale-ah 6.1 a tling a ni. 
Taliban sorkara natural disaster ministry hotu Mohammad Nassim Haqqani chuan lirnghing vanga thi zinga a tam zawk chu Paktika province-a Barmal, Ziruk, Naka leh Gayan district-a mite an nih thu sawiin, hliam tuar pawh emg emaw zat an awm a ni, a ti. Khost province-ah pawh thi leh hliam tuar tam tak an awm bawk. 
Lirnghing hian in tam tak sawichhiain, Pakistan province-ah hian lei min pawh a thlen phah bawk a ni. 
Interior ministry official Salahuddin Ayubi chuan lir nghinna hmun, thingtlang hmun kilkhawr zawk aṭangin report kimchang an la dawng lo a, report a luh kimah chuan chhiatna thleng vanga thi pawh hi an la pun chhoh ngei a rinawm thu a sawi. 
Pakistan ramah pawh lirnghing hi hriat a ni a, mahse thiltihchhiat leh thi an awm report a awm lo thung. 
Nimin zinga lirnghing hi a inṭanna aṭanga km 500 huam china awmten an hria niin European Mediterranean Seismological Centre (EMSC) chuan a tarlang. 
Afghanistan acting prime minister Mullah Mohammad Hassan Akhund chuan nimin zing khan emergency cabinet meeting a ko nghal a, lirnghing vanga thi chhungte an tuarpui thu sawiin, harsatna tawkte ṭanpui leh chhawmdawl turin theihtawp an chhuah dawn tih a sawi.