NKorea hotuin military meeting ko

North Korea ram hotu, Kim Jong-un chuan military meeting a ko a, sipai hotute nen an ram defence policy leh ralthuam siam dan chungchang an sawiho.

NKorea state media, Korean Central News Agency (KCNA) chuan rorellai, Workers' Party-a Central Military Commission meeting hi Thawhlehni aṭang khan neih ṭan niin, sipai thuam chak leh tihlen chungchang bakah kumin kum chanve hmalama defence lama an hnathawh hrang hrangte an thlirho nghal bawk tih a tarlang. Meeting hi nimin lamah pawh neih chhunzawm a ni a, eng chen nge neih a ni dawn a sawilang lo a, mahse ni eng emaw zat a awh rin a ni.

Kumin kum chanve chhungin NKorea hian ballistic missile enchhinaah record an siam tawh a, missile 31 an kapchhuak tawh. Heng zingah hian kum nga chhunga a vawi khatna atan intercontinental ballistic missile (ICBM) pawh an kapchhuak tel a ni. Kar liam ta pawh khan tuipuiah artillery sheel an kap niin SKorea sipaite chuan an sawi a ni.

Tun thla tir lam khan Kim chuan political conference-ah ralthuam siam hna pawh tihchak a nih tur thu a lo sawi tawh bawk.

NKorea-in missile a enchhin ṭhin hi South Korea leh US chuan an ngaimawh zual hle a, US chuan nuclear test a nei leh anih chuan UN-ah hrekna siam belh tura nawr a tum thu a sawi tawh a ni. US hian a hmain NKorea hrekna siam belhna tur resolution hi a lo pu lut tawh a, mahse UN Security Council-a permanent member, Russia leh China chuan an lo dang a ni. US chu NKorea nena inremna siamna tura inbiakna kalpui leh dan ngaihtuah zawk turin an ti.