Jordan leh Iraq-in Inkungkaihna ṭha zawk siam dawn

Jordanian foreign minister Ayman Safadi chuan Nilaini khan Iraq ram hruaitute inbiakna neihpuiin ram pahnih inkara inkungkaihna ṭha zawk siam dan tur an sawi. 

Ayman Safadi hian Iraq khawpui Baghdah-ah Iraq ram hruaitute hi a kawm a, Iraq president Barham Salih nen pawh inbiakna hi an nei a ni. Ram pahnih hruaitute hian Arab leh a chhehvel dinhmunte thlirin an chhehvela buaina chhuak chungchanga an dinhmunte an sawi dun a ni. 

Barham Salih chuan kawng hrang hrang­ah Jordan nena inkung­kaihna an neih chu tih­chak zel Iraq chuan a tum tih a sawi. Medical experience an neih angte chu inhrilhtawn a pawimawh thu a sawi a, a bikin coronavirus chung changah chuan a ṭul zual hle niin a sawi bawk.

Ayman Safadi pawhin kawng hrang hrangah Iraq nena an inkar chu siam ṭhat zel an tum tih a sawi a ni. 

Iraq Prime Minister Mustafa al-Kadhimi leh parliament Speaker Mohammed al-Halbousi-te pawh inbiakna hi a neihpui a, Iraq foreign minister Fuad Hussein nen pawh press conference an ko dun nghe nghe a, hetah hian Islamic State (IS) group laka Iraq-in hnehna a chan dan chungchangte an sawi bawk.