North Korea chuan US-in missile enchhin tawh lo tura a vau chungin nimin zing khan missile a enchhin leh a, mahse a kahchhuah hnu second reiloteah boruakah a puak nghal a ni. 
Tun hnaiah US leh NKorea inkar boruak hi a sosang hle a, US President Donald Trump chuan NKorea-in nuclear programme a kalpui chu titawp tura vawi tam tak ngen a nih hnuah a kalpui luih zel avangin chinfel dan ngaihtuah a ni dawn tih kar hmasa khan a sawi. Hemi kawngah hian NKorea ram ṭhian, China chu pui turin a sawm a, China hian a pui duh lo a nih pawhin harsatna a awm loh thu thu a sawi. US hian Korea peninsula-ah indo lawnglian pawh a chhawp hnai tawh a ni. 
Hetih lai hian NKorea chuan Inrinni khan an ram dintu, Kim IL Sung-a pian champha vawi 105-na lawmin, an ram khawpui Pyongyang-a inkhawm buatsaihah an ralthuam chi hrang hrangte pholan a ni a, he hunah hian ballistic missile thar nia hriat pawh pholan zingah hian a tel a ni. NKorea hian US-in a nawr lui zel a nih chuan nuclear ralthuam hmanga indo an inpeih thu a sawi. 
Nimin zinga NKorea-in missile a enchhina hi an ram khawchhak lam tuipuiah a ni a, mahse a hlawhtling ta lo a ni. South Korea chuan Sinpo bial aṭangin missile hi kah­chhuah a ni a, mahse kahchhuah a nih hnuah a puak ta niin a sawi. Eng ang missile nge a enchhin tih hriat a ni lo a, hriatchian tuma zirchian mek a nih thu SKorea lam chuan a sawi. NKorea hian tun thla tir khan Sinpo bial aṭang hian intercontinental ballistic missile (ICBM) a lo kapchhuak tawh bawk a ni. 
US Pacific Command pawhin nimin zing khan NKorea ballistic missile kahchhuah ni ngeia hriat hi an lo man a, mahse boruakah a puak ta a ni tiin Navy Commander Dave Benham chuan a tarlang. 
NKorea hian US vauna lakah tlawm duh loin a vaupung pawh a tina hle a, US ram laili kap pha thei tur missile a neih pawh a ṭul chuan a hman mai tur thu a sawi. Mahse official leh expert-te chuan NKorea hian US kap pha tur missile hi a neih an ring lo thung. 
US Vice President Mike Pence chu South Korea khawpui Seoul tlawh turin a zin a, a cham chhung hian South Korea ram hruaitute nen NKorea missile leh nuclear programme kalpui mek chinfel dan tur an ngaihtuah ang.