Turkey mipuite vote la

Turkey President Recep Tayyip Erdogan-a kaihhruai sorkarin an ram danpui siamṭhatna tura rawtna a siam chungchangah nimin khan mipui vote lak a ni.

Ram danpui siamṭhat tumnaah hian Turkey rama parliamentary system chu president-in thuneihna sang zawk a neihna tura rawt a ni. Eptu lam chuan president Erdogan-a’n thuneihna pumhmawm a tumna hmanrua nia sawiin an dodal nasa hle.

Nimin zing dar 7 aṭang khan vote lak a ni a, tlai dar 5 thleng hun hawn a ni. Vote lak hma, Inrinni khan President Erdogan chuan ram mipuite hnenah danpui siamṭhat tumna hi thlawpa, ‘Yes’ tia vote thlak ngei turin a ngen. System siam tum hi an ram boruak ngialnghet zawk siamna tur leh an ramin hma a sawnna tura an mamawh a ni tih a sawi. Danpui siamṭhat hi rorellai, Justice and Development Party (AK Party) bakah far-right Nationalist Action Party (MHP)-te’n an thlawp a ni.