China-ah ruah sur nasa vangin harsatna tawk

China chhim lama nasa taka ruah a sur avangin tuilian leh leimin a thleng a, mi tam takin an chenna hmun an chhuahsan tawh.

Ruahsur hian hmun hniam lama awm, Pearl River basin chu a chimpil tawh a, Covid-19 vanga China-in supply chain lama indaih lohna lian tak an neih mek karah hian thil siamchhuahna lam, manufacturing, shipping leh logistics operation thlengin a nghawng buai tawh a ni.

Guangdong, Fujian leh Guangxi province-ah May leh June thla laihawl inkara ruahtui tla zat chawhrual chu millimetre 621 (inches 24) a ni a, kum 1961 hnua ruahtui a tlak tam ber ṭum a nih thu China-a National Meteorological Center chuan a tarlang.

Guangdong-ah chuan class, office work leh public transport chu tihtawp a ni a, a ṭhenawm Jiangxi province-ah pawh mi 5,00,000-te chenna in chu a chhe tawh bawk a ni. Guangdong-a Shaoguan, Heyuan leh Meizhou khawpuiah pawh heng mite ang zat tho hian tuilian vang hian harastna an tawk mek bawk. Ruahsur nasa avangin khawpui ṭhenkhatah kawngpuite chu a chim a, chenna in, lirthei leh thlai tam tak a len bo tawh. Ruah hi a la sur chhunzawm dawn nia sawi a ni.

China-ah hian nipui laiin tuilian a thleng fo a, a bikin central leh area chhim lamah a sur nasa zual ṭhin. Kumina ruahtui tla hi kum tam tak hnua a tlak tam ber ṭum a ni. Tun hnaia China rama tuilian vanga chhiatna thleng rapthlak ber chu kum 1998-a Yangtze lui lian vanga thleng kha niin, chenna in maktaduai thum vel a chhiat bakah, mi 2,000 chuang an thihphah a ni.