Palestinian-te'n Jordan Valley-ah meeting nei

Palestine sorkar, Palestine Liberation Organization (PLO) leh Palestine president Mahmoud Abbas kaihhruai Fatah movement-te chuan Nilaini khan Jordan Valley-ah meeting an nei a, he meeting-ah hian Israel-in Palestinian ram, West Bank luah a tumna, annexation plan chungchang an sawiho a ni.

Meeting hi Jordan Valley-a Fasayel khuaah neih a ni a, Palestinian official-te chuan meeting-a an thurel chungchang hi kimchangin an la puangzar lo. Meeting zawh hian rally neih zui a ni a, he rally-ah hian Palestinian official senior-te chuan Israel annexation plan zawng zawng hi an duh lohna thu an au chhuah pui bakah he plan hian Palestinian-te a tih hrilhhai thu an au chhuah pui bawk.

Palestine prime minister Mohammed Ishtaye chuan Israel annexation plan chu a duh loh thu a sawi ve bawk a, Jordan Valley-a Palestinian-te chu sorkarin lo neihna lamah ṭanpuina a pek dawn thu a sawi bawk. Rally-a tel Palestinian official (hruaitute)-te chu nghet taka he plan hi dodal chhunzawm turin Ishtaye chuan a chah a, Palestinian hruaitute hmalakna avangin Palestinian (mipuite) chu an ṭanrual phah thu a sawi. 

Palestinian-te hian Israel annexation plan an dodal chhan hi Jordan Valley chu Israel-in chhuhsak a tum vang a ni a, he Jordan Valley-a hmun 30% chu Palestinian-te ram luah, West Bank huam chhunga awm a ni.