Turkey mipuiten danpui siamṭhat rawtna thlawp

Turkey President Recep Tayyip Erdogan-a kaihhruai sorkarin an ram danpui siamṭhat a rawt chungchanga mipui ngaihdan lakah, ram mipui tam zawkin President rawtna hi an thlawp.

Sorkarin danpui siamṭhat a tumah hian an rama parliamentary system chu thlak a, prime minister dinhmun tihbo a, pre­sident hnenah thuneihna sang zawk pek tum a ni. Pathianni khan mipui vote lak a ni a, vote tla zingah 51.3% chuan danpui siamṭhat tumna hi an thlawp a ni. He rawtna hi rorellai Justice and Development Party (AK Party) leh Nationalist Action Party (MHP)-in an thlawp a ni. Prime Miniter Binali Yildiram chuan mipuiten sorkar rawtna an thlawp chu lawmawm a tih thu a sawi a, ram mipuite chu unau vek niin, an ram chhiatna tur doin lungrual takin an ding zel a ni, a ti.

Hetih lai hian eptu pawl Republican People’s Party (CHP) leh People’s Democracy Party (HDP) bakah sawi­seltu dang chuan ram danpui siamṭhat tum dan hian mimal pakhat hnenah thuneihna a pe nasa lutuk nia sawiin an dodal thung. Eptute chuan mipuite vote thlak danah thil fel tawk lo a awm nia sawiin, vote chhiar nawn leh an phut.

Danpui hi siamṭhat a nih pawhin kum 2019-a president leh parliament inthlan an neih hnuah hman ṭan a ni chauh ang. President hnena thuneihna pek belh tur zingah minister ruatna tur te, high-level state official ruatna te, vice prisident bakah judicial body-a member zahve zel ruatna tura thuneihna pek a tel ang. Hei bakah hian president hian parliament a ṭhiat thei dawn a, thupek thar siamin emergency pawh a puang thei bawk ang.

President Erdogan chuan an ram political system chu a fuh tawk lo a, sorkar a nghet thei lo a, hei vang hian ram­chhung boruak pawh mumal loin sum lam thlengin a nghawng niin a sawi.