Philippines sipaite chuan Islamic State (IS) firfiak pawl nena inzawmna nei, Abu Sayyaf firfiakten sangha mantu pali an man zinga pakhat chu a lu an tansak niin an sawi. 
Philippines chhim lam, Jolo thliarkara military commander, Brigadier-General Cririlito Sobejana chuan nikum December thlaa Abu Sayyaf firfiakten Filipino sanghna mantu an man zinga pakhat chu Patilu khaw bul ramhnuaiah a lu an tansak niin Pathianni khan a sawi. 
Firfiakten an tihhlum hi Noel Besconde a ni a, nikum December thla khan Celebes Sea-ah an sangha manna lawng chu Abu Sayyaf pawl hian luhkhungin midang pathum nen an man a ni. Abu Sayyaf hi pawl lian vak lo ni mah se, mi rukbo leh bomb tihpuahnaah an inhnamhnawih fo a, an mi mante lu pawh an tansak fo a ni. 
Sabojena hian firfiakten an tihhlum Besconde hi a dam ṭha lo hle a, firfiakte tan an teikualna kawngah harsatna a thlen avangin an tihlum ta mai nia a rin thu a awi. Abu Sayyif pawl hi an an hmun hrang hrangah teikual reng an ni a, man tumin ngawrh takin an zawng mek tih a sawi. 
Philippines sipaite chuan Besconde-a ruang hi an la hmu lo a, mahse a lu tansak a nih lai video erawh chu an dawng tawh a ni.
Abu Sayyaf firfiakte hian nikum khan an mi man zinga mi, Canada mi John Ridsdel leh Robert Hall chu an lu an lo tansak tawh a, nikum vek February thlak han German mi Jurgen Kantner chu a tlanchhuahna tur sum atana an phut, dollar 600,000 pek a nih loh vangin a lu an lo tan tawh bawk.