EU-in Ukraine candidate status pe

Ukraine chu Ningani khan European Union zawm tuma a hmalaknaah candidate atan pawm a ni. EU ram 27-te chuan lungrual takin candidate atan hian an pawm a ni.

Russia-in an ram a run mek kara EU-in candidate atana a pawm hi Ukraine tan chuan ni chhinchhiahtlak tak a ni a, Ukraine hmalam hun chu EU kutah a awm tih Ukraine president Volodymyr Zelenskyy chuan a twitter-ah a tarlang.

European Commission president Ursula von der Leyen pawhin Europe ram tan pawh ni duhawm tak a nih thu a sawi ve bawk. EU hian Ukraine bakah a ṭhenawm, Moldova ram pawh candidate atan a pawm bawk.

Brussels-a EU hruaituten meeting-a Ukraine dilna pawmsak a nih hian Russia a tih thinur hle rin a ni thung. Nimin kha Russia president Vladimir Putin-a'n khawthlang ramte Russia thuneihna china an inrawlh avanga Ukraine laka "special military operation" a puan aṭanga thla li na chiah a ni.

Kumin February 24-a Russia-in a run hnu lawkah Ukraine hian EU member nih hi a dil ve nghal a ni. European Parliament chuan summit neih hma aṭangin Ukraine dilna hi an thlawp ṭha hle a, EU sorkarte pawh engmah tihkhawtlai loa chak taka hma la nghal turin a ti a ni.

Candidate status pek vang hian EU an zawm nghal thei tihna a ni lo a, security lamah pawh hnemhnam pui tur a la nei lo. Mahse EU member atana pawm a nih hnuah chuan EU treaty hnuaiah awm ve nghalin, EU ram dangte chuan an tih theih angin kawng hrang hrangin an pui thei ang. EU member nih hlawkna ber tur chu economic lamah a ni dawn a ni.